أنا فلاحك المغلوب المقهور
علو الأرض تلاقيني مليش دور
بزرع زرعتي بأمرك في أرض بور
وأبدر الأرض تقاوي تقاوي زور
وأعزقها وأنا نايم علي ترابها
وامسح عرقي بكفوفي وأنبها
وانا شايف الحسرة جواها بتألمها
وبتشاور تعالي إرويني وخضرني
ولو هتعافر وتعديلي 100 سور
أنا فلاحك المنسي بدون زرعة
ومعايا صبية حلوة شايلة الزالعة
حامل فاسي علي كتفي ولا لاقي ضي
ولا لاقي أرضي بتزرع ولافيها شي
وحوض يزرع وحوض تاني مش سمعة
وأنا العبيط أبو سديري إللي جف دمعة
كان زمان طرحي أخضر من كل لون
تتلم العيلة ونكون فرحانين يوم جمعة
وجاري فرحان بية وقايدلي 100 شمعة
أنا فلاحك الفصيح إللي قالوا علية متنور
نزلت البندر إتشقلبت رجعت بيتي متعور
لا ماري علية مية القلة ولاجدران الطين
ولا عيشك المقدد المندد من دة طحين
ولا طمي نيلك إللي راح واختفي وباش
حتي قراراتك بأيتي تاخديها من الأوباش
ضيعتي مني المعالم وخليتي ضميري صرخ
يصرخ في وشي ويقلي إنت واد غشاش
أزرع أرضك وارويها وإنضحلها مية الترعة
أنا فلاحك إللي ضاع منة أصلة والهوية
من يوم ما دخولي الكهربا وسهروني غية
وقعدوني قدام التلفزيون لحد الفجرية
فين زراعتي للقطن المصري أبو تيلة صغيرة
وابن والي إللي دمر الزراعة بالبتر والخنسرة
مين إللي كان السبب في رجوع بلدنا ورة
فين فرحتنا بوردة القطن أم لوزة منورة
وفرحتنا بجمعة وتعبيتة جوة لكياس
وفرحة الصبايا وهما بيعبوا يوماتي 100 قنطرة
أنا فلاحك إللي كان ضهرة ديما مسنود
كنت كافي خيري شري من إخضرار العود
كنت ببني كل يوم ليا ولناسي أمينة طوب
علو أرضي تلاقيها واقفة عافية ذي السدود
كنت بحلب بهايمي وخيرها في البلد موجود
وأة لو فية عروسة سمرا وبيعجنوا كحكها
تلاقي فلاحين البلد بتتسابق لحد عندها
يفيض الحليب ويزيد والباقي ليوم عرسها
كنت تلاقي خيرنا فايض متفرق منذ الجدود
أنا فلاحك المتربي جوة خير أرضك زمان
أدش البصلة ومعاها عود سريس وجلاوان
وحتة حادق من إيد أمي ولا جوز حمام
ورغفين عيش فلاحي وفطيرة مكن تمام
معجونة بسمن البلدى بريحة غيط الرمان
ويوم الجمعة يوم دبح الظفر ولمة العيلة
وكنا نتلم حولين الطبلية ونقول يا حليلة
وحلة المحشي ع الكانون تشم ريحتها
ريحة أصيلة تشتهيها وانت عند الجيران
والنهاردة كلة فيكي يابلد راح وإتغير
ومبأتشي أنا فلاحك إللي كان يوم شقيان
